Vendor napilitang suwayin ang ECQ dahil walang ayuda at gutom ang aabutin nila

Pansamantalang naging malinis ang mga kalsada sa paligid ng Quiapo Church nitong Lunes sa pagpapatupad ng enhanced community quarantine (ECQ) sa buong Kamaynilaan, kung saan ipinagbabawal ang mga vendor, manghuhula, at iba pang pumupuwesto at tumatambay doon.

Pero sa kabila ng paghihigpit, ilang vendor ang patakas na nagbebenta ng prutas sa lugar.
Paliwanag ni Roger Cagurangan, tindero, kahit bawal ay wala siyang magagawa kundi sumuway dahil gutom ang aabutin ng kaniyang pamilya.

“Gusto ko man sumunod sa utos ng gobyerno, paano kami mabubuhay, paano kikita? Buti sana kung may bibinibigay ang gobyerno,” ani Cagurangan, na may binubuhay na 4 na anak.

Dati raw ay kumikita siya ng P600 kada araw sa pagbebenta ng mansanas. Pero ngayong pandemya, suwerte na raw kung kumita siya ng P300.

Ayon kay Barangay 306 chairman Joey Jamisola, pinagbibigyan daw kahit papaano ang mga mobile vendor para lang may kitain at may pangkain sila. Pero mahigpit daw na ipinagbabawal ang maglatag ng puwesto para magtinda.

Nasa 150 ang mga residente nilang vendor, kaya’t problema nila ang pangkain lalo na kung magtatagal ang ECQ.

Facebook Comments